ടാർഗറ്റ് തികയ്ക്കാൻ ഉപഭോക്താവിനെ ബലിയാടാക്കരുത്, ബാങ്കുകളുടെ ഇൻഷുറൻസ് കച്ചവടത്തിനെതിരെ കേന്ദ്രം

ബാങ്കുകൾ വഴി ഇൻഷുറൻസ് പോളിസികളും മറ്റ് നിക്ഷേപ പദ്ധതികളും ഉപഭോക്താക്കളുടെ തലയിൽ കെട്ടിവെക്കുന്ന രീതി ഇനി അനുവദിക്കില്ലെന്ന് കേന്ദ്ര ധനമന്ത്രി നിർമ്മല സീതാരാമൻ. ബാങ്കുകളുടെ ഇത്തരം തെറ്റായ നടപടികളെ കേവലം ഒരു ബിസിനസ്സ് തന്ത്രമായി കാണാനാവില്ലെന്നും, ഇതൊരു ഗുരുതരമായ കുറ്റമാണെന്നും മന്ത്രി വ്യക്തമാക്കി.

എന്താണ് ഈ 'മിസ് സെല്ലിങ്‌'?

ലളിതമായി പറഞ്ഞാൽ, ഒരു ഉപഭോക്താവിന് ആവശ്യമില്ലാത്തതോ അല്ലെങ്കിൽ അവർക്ക് ദോഷകരമായതോ ആയ പദ്ധതികൾ തെറ്റായ വിവരങ്ങൾ നൽകി വിൽക്കുന്നതിനെയാണ് 'മിസ് സെല്ലിങ്‌' എന്ന് പറയുന്നത്.ഉദാഹരണത്തിന് ബാങ്കിൽ സ്ഥിര നിക്ഷേപം ഇടാൻ വരുന്ന പ്രായമായവരോട്, അത് ഇൻഷുറൻസ് പോളിസിയാണെന്ന് പറയാതെ ഒപ്പിടുവിച്ച് പണം വാങ്ങുക.ലോൺ നൽകുന്നതിന്റെ ഭാഗമായി നിർബന്ധപൂർവ്വം ഏതെങ്കിലും ഇൻഷുറൻസ് എടുപ്പിക്കുക.പദ്ധതിയുടെ നഷ്ടസാധ്യതയെ കുറിച്ച് പറയാതെ ലാഭം മാത്രം വാഗ്ദാനം ചെയ്ത് നിക്ഷേപിപ്പിക്കുക ഇതെല്ലാം 'മിസ് സെല്ലിങ്' എന്നതിൽപ്പെടും.

ധനമന്ത്രിയുടെ താക്കീത്

ബാങ്കുകൾ അവരുടെ പ്രധാന ജോലിയായ വായ്പ നൽകുന്നതിലും നിക്ഷേപം സ്വീകരിക്കുന്നതിലുമാണ് ശ്രദ്ധിക്കേണ്ടത്. ലാഭം വർദ്ധിപ്പിക്കാൻ വേണ്ടി ഉപഭോക്താക്കളെ കബളിപ്പിക്കുന്നത് അംഗീകരിക്കാനാവില്ല. ഇത് ബാങ്കിംഗ് മേഖലയിലുള്ള ജനങ്ങളുടെ വിശ്വാസം തകർക്കുമെന്നും മന്ത്രി ഓർമ്മിപ്പിച്ചു.ഈ പ്രശ്നം പരിഹരിക്കുന്നതിനായി റിസർവ് ബാങ്ക് ഓഫ് ഇന്ത്യ ഉടൻ തന്നെ പുതിയ മാർഗ്ഗനിർദ്ദേശങ്ങൾ പുറത്തിറക്കും. ബാങ്ക് ജീവനക്കാർക്ക് ഇൻഷുറൻസ് വിൽക്കാൻ നൽകുന്ന അമിത സമ്മർദ്ദവും ടാർഗറ്റുകളും കുറയ്ക്കാനാണ് ഇതിലൂടെ ലക്ഷ്യമിടുന്നത്.

സാധാരണക്കാർ എന്തൊക്കെ ശ്രദ്ധിക്കണം

ബാങ്കിൽ നിന്ന് ഏതെങ്കിലും പേപ്പറിൽ ഒപ്പിടുന്നതിന് മുൻപ് അത് എന്തിനാണെന്ന് കൃത്യമായി ചോദിച്ചു മനസ്സിലാക്കുക.സ്ഥിര നിക്ഷേപമാണോ അതോ ഇൻഷുറൻസ് ആണോ എന്ന് ഉറപ്പുവരുത്തുക.നിങ്ങളുടെ അറിവോ സമ്മതമോ ഇല്ലാതെ ഏതെങ്കിലും സ്കീമിൽ പണം പിടിച്ചിട്ടുണ്ടെങ്കിൽ ഉടൻ തന്നെ ബാങ്ക് മാനേജർക്കോ ബാങ്കിംഗ് ഓംബുഡ്സ്മാനോ പരാതി നൽകുക.

ബാങ്കുകൾ എന്നത് കേവലം ലാഭം കൊയ്യാനുള്ള സ്ഥാപനങ്ങൾ മാത്രമല്ല, മറിച്ച് ജനങ്ങളുടെ വിശ്വാസത്തിന്മേൽ നിലനിൽക്കുന്ന പ്രസ്ഥാനങ്ങളാണ്. ടാർഗറ്റുകൾ പൂർത്തിയാക്കാൻ ഉപഭോക്താക്കളുടെ അറിവില്ലായ്മയെ ചൂഷണം ചെയ്യുന്ന രീതിക്ക് അറുതി വരുത്താനാണ് കേന്ദ്ര ധനമന്ത്രിയും റിസർവ് ബാങ്കും ഇപ്പോൾ ലക്ഷ്യമിടുന്നത്.

ബാങ്കിൽ നിന്ന് ഏതൊരു രേഖയിൽ ഒപ്പിടുമ്പോഴും അത് എന്തിനാണെന്ന് കൃത്യമായി ചോദിച്ചു മനസ്സിലാക്കുക. അനാവശ്യമായ ഇൻഷുറൻസുകളോ നിക്ഷേപങ്ങളോ നിങ്ങളുടെ തലയിൽ കെട്ടിവെക്കാൻ ശ്രമിച്ചാൽ ഭയപ്പെടാതെ പ്രതികരിക്കുക. ബാങ്കിംഗ് സേവനങ്ങളിൽ സുതാര്യത ഉറപ്പാക്കാൻ ഉപഭോക്താക്കളുടെ ജാഗ്രതയും ആവശ്യമാണ്.

Content Highlights: Banks can't afford to mis-sell, it is an offence: Finance Minister Nirmala Sitharaman